मंगळवेढा (प्रतिनिधी): पंढरपूर-मंगळवेढा विधानसभा मतदारसंघातील अरळी गावचे स्व.कलाप्पा शिऱ्याप्पा पांढरे या शेतकरी बांधवाने २२ जानेवारी २०२३ रोजी आत्महत्या करुन आपली जीवनयात्रा संपवली होती. सदर मयत वारसाच्या पत्नीस मतदारसंघाचे आमदार समाधान आवताडे यांच्या हस्ते गुरुवारी तहसील कार्यालय मंगळवेढा येथे धनादेश वितरीत करुन शासकीय अर्थसहाय्य करण्यात आले. जगाचा पोशिंदा असणारा बळीराजा जेव्हा असे टोकाचे पाऊल उचलतो तेव्हा मात्र मानवतेचे सर्व कंगोरे गळून पडतात. दुष्काळी तालुका असा कलंक माथी असणाऱ्या या मंगळवेढा तालुक्याचे नंदनवन होण्याचे दिवस अतिशय जवळ आले आहेत, त्यामुळे यापुढील काळामध्ये एकही शेतकरी आपल्या जीवाला मुकणार नसल्याचा विश्वास आमदार आवताडे यांनी व्यक्त करुन स्व.पांढरे यांच्या कुटुंबीयांचे सांत्वन केले.
सदर प्रसंगी जिल्हा नियोजन समिती सदस्य प्रदीप खांडेकर, जिल्हा लेबर फेडरेशन संचालक सरोजभाई काझी, प्रांताधिकारी बी.आर.माळी तहसीलदार मदन जाधव,अशोक केदार, गंगाधर काकणकी आदी मान्यवर प्रशासकीय अधिकारी, पदाधिकारी आणि कर्मचारी उपस्थित होते.
